WARUNG POJOK PESBUK (1)

5 July 2012 02:07 WIB
 

Geus ilahar dipilemburan mah, sok galécok nu gunem catur di warung, bari jeung ngopi boh isuk-isuk saméméh indit ka sarawah atawa samulangna. Ceuk uing, politikus lembur ieu payus lamun ditaékeun jadi tulisan, lain ngan ukur tutur tinular wungkul. Sanajan dina prak-prakanamah lain dua inohong anu galécok ngobrol téh, réa pisan, ngan ku uing di simpulkeun jadi dua wé nya, jeung ngaran inohong ieu lain sabenerna. Mangga bandungan:

Mang Unil    : Ngabandungan politikus ayeuna sok ku ara aya aya wé siga nu euweuh pagawéan pisan, nya Jang!
Mang Gareng    : Naha kitu kumaha Mang?
Mang Unil    : Hok titenan ku maneh aya Menteri anu ngusulkeun ngakurkeun jam sa Indonesia, meureun mun jam 7 di Jakarta di Papua ogé sarua jam 7, pikirna lamun jam sakitu di Jakarta geus gawé di Papua ogé keur gawé, apanan meureun pikir manehna. Tapi nitenan dina buku Geografi budang Emang nu kelas 6 SD, lamun di Jakarta jam 7 di Papua mah jam 9 lin?
Mang Gareng    : Enya, atuh siga teu pernah diajar Geografi, nya Mang?
Mang Unil    : Bisa jadi, matak budak manéh ari sakola téh sing bener pinter ulah kabalinger, sugan wé kahareupna ti urang aya nu jadi Menteri
Mang Gareng    : Amin mang.
Mang Unil    : Lain ngaaminan wungkul da gampang éta mah, tapi kudu dibarengan ku tarekah paripolah pikeun ka arah éta, sakolakeun budak sing junun jucung
Mang Gareng    : Enya, mang. Tapi alesan éta menteri kumaha nepi ka aya pamikiran ka béh dinya?
Mang Unil    : (Suruput nguyup cikopi sabekong, saméméh ngajawab) Ceunah mah, manehna kungsi di Singapura jang, ari Singapura apanan letak geografisna oge ngan sagorowék, atuh wajar wé lamun tiap daérah sarua waktu-na, ceunah lamun diakurkeun bisa mangaruhan kana etos kerja.
Mang Gareng    : Baruk bisa kitu, alatan tina akur waktu, éta téh hasil panalungtikan saha mang, aya ku edun?
Mang Unil    : Ah duka teuing, ngan ceuk Amang anu hirup di lembur. Aya-aya waé atuh para pejabat urang téh nyieun kawijakan anu araranéh, keun atuh anu tidak prinsip-mah, tong di ucah acéh, loba kenéh lah ceuk amang mah pamikiran anu séjén, rejeungna deui, etos kerja mah teu aya pangaruhna jeung diakurkeun kana waktu. Apanan angger wé anu mumul hudang isuk-mah berang hudangna. Anu horéam indit ka kantor loba nu bolos.
Mang Gareng    : Abdimah ngabayangkeun téh dina pas waktuna sholat mang, lamun Shubuh di Jakarta jam 5, meureun di Papua mah geus moreret panon poé, geus surup ka waktuna Dhuha. Teuing kétang lamun lamun jadwalna dirubah diundur 2 jam, alah ribet ceuk uing mah mang.
Mang Unil    : Euh, geuning pinter kénéh manéh, nu hirup sapapoé kuli ngagebug paré
Mang Gareng    : Ah, Amang mah tong ngungkit-ngungkit masalah profési. Apanan kuli ngagebug téh  keur biaya pencalonan jadi Bupati Sumedang, ceuk béja ceunah ieu mah, hayang jadi calon bupati kudu nyekel duit 20 Milyar minimalna 2 miliar.
Mang Unil    : Geus meunang duit sakitu téh?
Mang Gareng    : Boro, boro sami lieur wé nu aya mah
Mang Unil    : Nurus tunjung sia mah. Heueuh ketang kudu aya bukti nyata hayang ngamajukeun Sumedang mah, boh tina idé atawa pamikiran atawa nu sejena da ceuk Amang teu kudu hayang-hayangangan jadi Bupati, cukup anu boga kriteria anu sapamadegan, yu urang rojong. Da lain ku cumarita tanpa nya, loba catur tanpa bukur, pikeun ngamajukeun Sumedang mah. Ceuk pembina sumedangonline tea mah, rahayat Sumedang kudu bisa milih pamingpin anu siap rek nyebakeun dirina pikeun kamajuan Sumedang, lain rek ngagadabah Sumedang.
Mang Gareng    : Aya kitu anu kitu mang?
Mang Unil    : Nya tugas ilaing salaku budak ngora pikeun neangan anu kitu
Mang Gareng    : Lieur mang, da angger-angger  kénéh wé ari geus prak prakana mah. Ayeuna panan loba masyarakat anu geus haré-haré hirup, ceunah rek datang ka TPS ngan ukur ngalaksanakeun kawajiban, saha nu dicoloknamah engké, kumaha paku wé ceunah, malah rek bari peureum nyolokna gé
Mang Unil    : Alah cilaka siah jang, lamun rahayatna geus apatis kitu mah, iraha rek majuna atuh urang Sumedang. Pajar hayang maju tapi dina milih pamingping mumul
Mang Gareng    : Eta téh alatan kanyenyerian Mang
Mang Unil    : Teuing atuh ari kitu mah, hayu ah akang mah rék ngayuman heula paré, kamari ka banjiran
Mang Gareng    : Enya atuh ari kitumah ke urang ngobrol deui di Warung Pojok Pesbuk, susuganan aya sasieureun sabeunyeureun.
Mang Unil    : Enya jang hayu ah …!(*)

This site uses Akismet to reduce spam. Learn how your comment data is processed.